निर्वाचन र नयाँ युगको अपेक्षा

– भरतविक्रम ढकाल
भदौ २३ र २४ गतेको जेन जी समूहको विद्रोहपछि नेकपा एमालेका अध्यक्ष केपी शर्मा ओली नेतृत्वको सरकार ढल्न पुगेको थियो। त्यो आन्दोलन र विद्रोहको पृष्ठभूमिबाट नेपालमा राजनीतिको नयाँ मोड सुरु भएको थियो। विशेष गरी भ्रष्टाचार, अन्याय र अत्याचारजस्ता विषयमा जनताले विगतदेखि नै आवाज उठाउँदै आएका थिए। विगतका सरकारले जनताको मागअनुसार काम नगरेको कारण व्यापक असन्तुष्टि देखापरेको थियो।

सामाजिक सञ्जालमा देखिएको असन्तुष्टि सडक आन्दोलनमा परिणत भयो र परिणामस्वरूप एमाले अध्यक्ष ओली नेतृत्वको सरकार अपदस्त भयो। सडकबाटै सरकार फालिएको नेपालको इतिहासमा सम्भवतः यो पहिलो घटना हो।

त्यसपछि राजनीतिक शून्यताको अन्त्यका लागि पूर्व प्रधानन्यायाधीश सुशीला कार्कीको अध्यक्षत्वमा अन्तरिम सरकार गठन गरियो। अहिले उक्त सरकार फागुन २१ गतेको निर्वाचनको तयारीमा लागेको छ। यसका लागि माघ ६ गते मंगलबार प्रत्यक्ष तर्फको उम्मेदवारी दर्ता प्रक्रिया सम्पन्न भएको छ। यसअघि समानुपातिक तर्फको उम्मेदवारी दर्ता प्रक्रिया पनि सम्पन्न भइसकेको थियो।

बीचमा विभिन्न कारणले निर्वाचन हुन नसक्ने चर्चा भए पनि सरकार र निर्वाचन आयोग निर्वाचनमा केन्द्रित रहे। यसले कार्यक्रमअनुसार निर्वाचन प्रक्रियालाई प्रभावकारी बनायो।

बीचमा विभिन्न कारणले निर्वाचन हुन नसक्ने चर्चा भए पनि सरकार र निर्वाचन आयोग निर्वाचनमा केन्द्रित रहे। यसले कार्यक्रमअनुसार निर्वाचन प्रक्रियालाई प्रभावकारी बनायो।

पुष २७–३० गते नेपाली कांग्रेसको दोस्रो विशेष महाधिवेशन सम्पन्न भयो। महाधिवेशनले शेरबहादुर देउवालाई सभापतिबाट हटाएर गगन थापाको सभापतित्वमा नयाँ कार्यसमिति गठन गर्यो। यस घटनापछि निर्वाचनमा बाधा पर्न सक्छ भन्ने आशंका थियो, तर पार्टीभित्रको विवाद समाधान भएपछि असन्तुष्ट पक्षसमेत सम्पूर्ण रूपमा निर्वाचनमा सहभागी भयो।

यसले निर्वाचनको वातावरणलाई सकारात्मक बनाएको छ। राजनीतिक दलले उल्लासपूर्ण रूपमा उम्मेदवारी दर्ता गराएका छन् र उम्मेदवारहरू अब सक्रिय रूपमा घरदैलो, सार्वजनिक कार्यक्रम र जनसम्पर्कमार्फत आफूलाई जनतासमक्ष प्रस्तुत गर्नेछन्। नेपाल सरकारले शान्ति सुरक्षाको वातावरण सुनिश्चित गरेको छ, जसले निर्वाचनलाई शान्तिपूर्ण र भयरहित बनाउने अपेक्षा जगाएको छ।

नेपाल सरकारले शान्ति सुरक्षाको वातावरण सुनिश्चित गरेको छ, जसले निर्वाचनलाई शान्तिपूर्ण र भयरहित बनाउने अपेक्षा जगाएको छ।

अबको निर्वाचनमार्फत नयाँ प्रतिनिधिहरू संसदमा आउने अपेक्षा गरिएको छ। उनीहरूले संसदमा सशक्त रूपमा काम गर्न, संविधान संशोधनमा योगदान दिन र देश तथा जनताको आवश्यकतालाई सम्बोधन गर्न सक्नेछन्। निर्वाचनमार्फत नेपालले नयाँ नेतृत्व पाउनेछ। आशा गरौं, यसपछि नेपाल नयाँ युगमा प्रवेश गर्नेछ।
प्राय: पुराना पुस्ता बिदा भइसकेका छन्। यस अवस्थामा नयाँ पुस्ताले देशको नेतृत्व गर्ने अवसर पाएको छ। नयाँ पुस्ता नेतृत्वमा आउँदा नेपाल र नेपालीको भविष्य उज्ज्वल हुने आशा गरिएको छ। यसले नेपाललाई विगतको ढाँचाबाट बाहिर निकालेर नयाँ युगतर्फ प्रवेश गराउने अपेक्षा जगाएको छ।
छिमेकी भारत र चीन विकासको उन्नत अवस्थामा पुगेको अवस्थामा, नेपालले पनि आफूलाई उस्तै स्तरमा पुर्‍याउनुपर्ने आवश्यकता छ। यसका लागि सशक्त संसद र बलियो सरकार अनिवार्य छ। निर्वाचनबाट आउने प्रतिनिधिहरूले यो अपेक्षा पूरा गर्नेछन्।
उम्मेदवारहरूले जनताको विश्वास जितेर संसदमा उपस्थित हुनेछन्। यो नेपालको इतिहासमा नयाँ प्रकारको संसद हुनेछ, जहाँ धेरै नयाँ अनुहारले भाग लिनेछन् र नेपालको नयाँ युगको प्रतिनिधित्व गर्नेछन्। यही आशा र अपेक्षाका साथ आगामी निर्वाचन हुने छ र परिणाम पनि त्यस्तै प्राप्त हुने अपेक्षा गरिएको छ।